پاکستان سپر لیگ سیزن (5)مکمل پاکستان میں کرانے پر اتفاق

پاکستان سپر لیگ (پی ایس ایل) کی انتظامیہ نے پی ایس ایل فائیو مکمل طور پر پاکستان میں کرانے کا فیصلہ کیا ہے۔

پاکستان سُپر لیگ (پی ایس ایل) کی جنرل کونسل کا اجلاس کراچی میں ہوا جس کی صدارت پاکستان کرکٹ بورڈ (پی سی بی)کے چیئرمین احسان مانی نے کی۔

اجلاس میں پی ایس ایل کی فرنچائزز کے نمائندگان نے شرکت کی جس میں فریقین کے درمیان پی ایس ایل فائیو مکمل طور پر پاکستان میں کرانے پر اتفاق کیا گیا۔

کراچی میں ہونے والے اجلاس میں پی سی بی اور فرنچائزز کے درمیان اہم امور پر تبادلہ خیال کیا گیا ، اس کے علاوہ پی ایس ایل فائیو کی ڈرافٹنگ کی مجوزہ تاریخ پر بھی بات چیت ہوئی۔

پاکستان کرکٹ بورڈ کے چیف ایگزیکٹو وسیم خان کے مطابق اجلاس میں فرنچائزز کے ساتھ مفید گفتگو ہوئی، فرنچائز نمائندگان ہمارے ساتھی ہیں، اُن سے پی ایس ایل فائیو کے تمام میچز پاکستان میں کرانے پر اتفاق ہوا ہے۔

وسیم خان کا کہنا تھا کہ پاکستان سُپر لیگ کے نئے ایڈیشن کی تیاریوں کا آغاز جلد ہوگا۔پی ایس ایل 5 میں کرکٹ کے مداح بہترین کھیل دیکھیں گے اور دُنیا کے بہترین کھلاڑی ایکشن میں نظر آئیں گے۔

شاید آپ یہ بھی پسند کریں

جواب چھوڑیں

آپ کا ای میل ایڈریس شائع نہیں کیا جائے گا.